Le texte de cette page a été corrigé et est conforme au fac-similé.
II
Que me vault donc le complaindre
Ne moy plaindre
De la doulour que je port
Quant en riens ne puet remaindre ?
Ains est graindre
Et sera jusqu’à la mort.[1]
Tant me vient doulour attaindre,
Que restraindre
Ne puis mon grant desconfort ;
Que me vault donc le complaindre ?
Quant cil qu’amoye sanz faindre
Mort estraindre[2]
A voulu, dont m’a fait tort ;
Ce a fait ma joye estaindre,
Ne attaindre
Ne poz puis a nul déport ;
Que me vault donc le complaindre ?
III
Je suis vesve, seulete et noir vestue,
A triste vis simplement affulée ;
En grant courroux et manière adoulée
Porte le dueil très amer qui me tue.