Page:De Pisan - Œuvres poétiques, tome 1.djvu/203

X

Puis qu’Amours le te consent,
Par qui as empris l’emprise,
Amis, dont tu m’as surprise,
Mon cuer aussi s’i assent.

Mon vouloir du tout descent^[1]
A toy amer sanz faintise,
Puis qu’Amours le te consent.

Si n’a il pas un en cent
Dont Amours m’eust ainsi prise ;
Mais quant c’est par ta maistrise^[2]
Ne te doy estre nuisant,^[3]
Puis qu’Amours le te consent.

XI

DE triste cuer chanter joyeusement
Et rire en dueil c’est chose fort a faire,^[4]
De son penser monstrer tout le contraire,^[5]
N’yssir doulz ris de doulent sentement,

Ainsi me fault faire communement,
Et me convient, pour celer mon affaire.
De triste cuer chanter joyeusement.

1. X. — 5 B M. cuer encline et descent
2. — 10 M. q. c’est pour sa m.
3. — 11 A¹ e. musent.
4. XI. — 2 A¹ est c. — B c. forte a. f.
5. — 2 et 3 intervertis dans A²