vieille, qui entendit bien que vouloyent dire ces parolles, n'en fit pas pourtant grand semblant, et luy accorda aysément de luy bailler sa fille, contraincte par povreté, luy promettant de la luy envoyer le dimanche prochain : ce qu'elle fit. Quand la jeune garse fut à la ville, elle fut toute esbahye de voir tant de gens, parce qu'elle n'avoit encores veu que des vaches. Et, pource, le procureur ne luy parloit encores de rien, mais alloit tousjours chercher ses aventures en la laissant un peu asseurer. Et puis il luy vouloit faire faire des accoustremens, à fin qu'elle eust meilleur courage de bien faire[1]. Or il avoit un clerc en sa maison, qui n'avoit point toutes ces considerations là, car au bout de deux ou de troys jours, estant le procureur allé disner en ville, quand il eut avisé ceste garse ainsi neufve, il commence à se faire avec elle, luy demandant dont elle estoit et lequel il faisoit meilleur aux champs ou à la ville. « Mamie, dit-il, ne vous souciez de rien ; vous ne pouviez pas mieulx arriver que ceans. Car vous n'aurez pas grand peine ; le maistre est bon homme : il fait bon avec luy. Or ça, m'amie, disoit-il, ne vous ha il point encores dit pouquoy il vous ha prise ? — Nenny, dit elle ; mais ma mere m'ha bien dit que je le servisse bien et que je retinse bien ce qu'on me diroit, et que je n'y perdrois rien. — Mamie, dit le clerc, vostre mere vous ha bien dit vray. Et, pource qu'elle sçavoit bien que le clerc vous diroit tout ce que vous auriez affaire, ne vous en ha point parlé plus avant. Mamie, quand une jeune fille vient à la ville chez un procureur, elle se doit laisser faire au clerc tout ce qu'il voudra : mais aussi le clerc est tenu de luy enseigner les coustumes de la ville et les complexions de son maistre, à fin qu'elle sache la maniere de le servir ; autrement, les povres filles n'apprendroyent jamais rien, ny leur maistre ne leur feroit jamais bonne chere et les renvoyeroit au village. » Et le clerc le disoit de tel escient, que la povre garse n'eust osé faillir à le croire, quand elle oyoit parler d'apprendre à bien servir son maistre. Et respondit au clerc d'une parolle demy rompue et d'une contenance toute niaise : « J'en serois bien tenue à vous[2] ! » disoit-elle. Le
