Page:Desperiers - Cymbalum mundi, Delahays, 1858.djvu/120

de beufz le rencontra) qu'un valet de boucher menoit devant soy ; l'un desquelz quidem beufz, comme monsieur le docteur passoit sus sa mule, vint frayer un petit contre sa robe, dont il se print incontinent à crier : « A l'ayde ! ô le meschant beuf ! il m'ha tué ! je suis mort ! » A ce cry s'amasserent force gens, car il estoit bien congneu, parce qu'il y avoit trente ou quarante ans qu'il ne bougeoit de Paris, lesquelz, à l'ouir crier, pensoyent qu'il fust enormement blessé. L'un le soustenoit d'un costé, l'autre d'un aultre, de peur qu'il ne tombast de dessus sa mule. Et entre ses hauts criz, il dit à son famulus^[1], qui avoit nom Corneille : « Vien ça ! Eh ! mon Dieu ! va t'en aulx escolles, et leur dy que je suis mort, et qu'un beuf m'ha tué, et que je ne sçaurois aller faire ma lecture, et que de sera pour une aultre foys. » Les escolles furent toutes troublees de ces nouvelles, et aussi messieurs de la faculté. Et incontinent l'allerent veoir quelques uns d'entre eulx qui furent deputez, qui le trouverent estendu sus un lit, et le barbier^[2] environ, qui avoit des bandeaux d'huiles, d'onguens, d'aubins d'eufs^[3] et tous les ferrementz en tel cas requis. Monsieur le docteur plaignoit la jambe droite si fort, qu'il ne pouvoit endurer qu'on le dechaussast, mais fallut incontinent descoudre la chausse. Quand le barbier eut veu la jambe à nud, il ne trouva point de lieu entamé ny meurdry^[4], ni aulcune apparence de blessure, combien que tousjours monsieur le docteur criast : « Je suis mort, mon amy ! je suis mort ! » Et quand le barbier y vouloit toucher de la main, il crioit encores plus haut : « Oh ! vous me tuez ! je suis mort ! — Et où est ce qu'il vous fait le plus de mal, Monsieur ? disoit le barbier. — Et ne le voyez vous pas bien ? disoit il. Un beuf qui m'ha tué et il me demande où c'est qu'il m'ha blessé ! Eh ! je suis mort ! » Tantost le barbier luy demandoit : « Est ce là, Monsieur ? — Nenny. — Et là ? — Nenny.  » Brief, il ne s'y trouvoit rien. « Eh ! bon Dieu ! qu'est cecy ? Ces gens icy ne sçauroyent

1. Le famulus d'un maître ès arts n'est pas un valet, comme le dit M. Lacour, mais un cuistre, exécuteur des hautes et basses œuvres du pédant.
2. La profession de barbier n'était point encore séparée de celle de chirurgien, à cette époque.
3. Blancs d'œufs ; aubin dérive d'albus, dont on a fait albinus et albumen.
4. Pour : meurtri. Ordinairement, à cette époque, meurdrir s'employait dans le sens de tuer, sinon blesser à mort.