portant son disner, quand il t’ha demandé que c’estoit que tu luy apportoys, que tu luy ayes respondu un poullet, et veult que tu dies des poulletz, et non pas un poullet. Voilà ce qu’il veut dire par plurier nombre, entends tu ? » La pedisseque retint bien cela. De là à quelques jours, La Roche Thomas estant encor allé disner chez un sien voisin, ne sçay si c’estoit chez le mesme de l’autre jour, sa chambriere luy porte son disner. La Roche Thomas luy demande selon sa coustume, que c’est qu’elle afferoit. Elle, se souvenant bien de sa leçon, respondit incontinent : « Monsieur, ce sont des beufz et des moutons. » Dont elle appresta à rire à toute la presence[1], principalement quand ilz eurent entendu qu’il apprenoit à sa chambriere à parler en plurier nombre.
NOUVELLE XV.
Du temps du roy Louys douziesme, y avoit un cardinal de la maison de Luxembourg, lequel fut evesque du Mans[2] et se tenoit ordinairement sus son eschevé, homme vivant magnifiquement, aymé et honnoré de ses diocesins, comme prince qu’il estoit. Et avec sa magnificence, avoit une certaine privaulté qui le faisoit encores mieulx vouloir de tout le monde. Et mesmes estoit facecieux en temps et lieu. Et s’il aymoit à gaudir, il ne prenoit point en mal d’estre gaudy. Un jour se presenta à luy une bonne femme des champs, comme il estoit facile à escouter toutes personnes. Laquelle après s’estre agenouillee devant luy et ayant eu sa benediction, comme ilz faisoyent
- ↑ L’assistance, l’assemblée.
- ↑ Philippe de Luxembourg avait été évêque du Mans et cardinal ; il était né en 1445, et mourut en 1519. Il joua un rôle politique important sous le règne de Louis XII. « Philippe est fondateur du collège du Mans, en l’Université de Paris, dit La Croix du Maine, dans sa Bibliographie françoise, et a basti plusieurs superbes palais et maisons somptueuses et entre autres le chasteau d’Yvray-l’Evesque, à une lieue du Mans, etc. »
