auquel jeu elles exploicterent si bien, que les enseignes[1] en sortirent. Car la plus agée, qui estoit meure et drue, ne se print garde que le ventre luy leva, dont elle fut un peu estonnée. Car il n'y avoit moien de se tenir couverte, d'autant qu'en un lieu où il n'y ha point de meres, lesquelles se prennent garde que leurs filles ne soient trop tost abusées, ou bien elles sçavent remedier aux inconveniens quand il leur est advenu quelque surprise. Et, la fille n'ayant advis ny moien aulcun de se desrober sans le congé de son pere, ce fut force qu'il le sceust. Quand il eut entendu ceste nouvelle, il en fut fasché de prime face[2] ; mais il ne s'en desespera point aultrement, d'autant qu'il estoit de ceste bonne paste de gens qui ne prennent point trop les matieres à cueur. Et, à dire vray, dequoy sert-il de se tourmenter d'une chose, quand elle est faicte, sinon de l'empirer ? Il envoye soudain sa fille aisnée à deux ou trois lieux de là, chez une de leurs tantes, soubz couleur de maladie, et que, par l'advis des medecins, le changement d'air luy estoit necessaire ; et en attendant que les petits piedz sortissent[3]. Mais comme une fortune ne vient jamais seule, ce pendant qu'elle sortoit d'affaires, sa sœur la seconde y entroit, peut-estre par permission divine, pour s'estre en son cueur mocquée de sa sœur aisnée : dont Dieu la voulut punir. Pour faire court, elle s'apperceut qu'elle en avoit dedans le dos, dy-je dedans le ventre ; et le pere le sceut aussi. « Et bien, dit-il, Dieu soit loué ! c'est le monde qui croist : nous fusmes ainsi faitz. » Et là dessus, se doubtant de tout, il s'en vint à la plus jeune, laquelle n'estoit pas encores grosse, mais elle en faisoit son devoir tant qu'elle pouvoit. « Et toy, ma fille, comment te portes-tu ? N'as-tu pas bien suivy le train de tes sœurs aisnées ? » La fille, qui estoit jeunette, ne se peut tenir de rougir ; ce que le pere print pour une confession. « Or bien, dit-il, Dieu nous doint[4] bonne aventure, et nous garde de plus grande fortune ! » Si se pensa pourtant qu'il estoit temps de pourvoir à ses affaires, ce qu'il congnoissoit fort bien ne pouvoir mieulx
