[Bl. 176b] es chambres sa fille est entrez.
485 As eschés cumence a juër
a un chevalier d’ultre mer ;
de l’altre part de l’eschekier
sa fille deveit enseignier.
Elidus est alez avant.
490 Li reis li fist mult bel semblant,
de juste lui seeir le fist.
Sa fille apele, si li dist :
’Dameisele, a cest chevalier
vus devriëz bien aquintier
495 e faire lui mult grant honur ;
entre cinc cenz nen a meillur.’
Quant la meschine ot esculté
ceo que sis sire ot cumandé,
mult en fu liee la pucele.
500 Dresciee s’est, celui apele ;
luinz des altres se sunt asis.
Amdui erent d’amur espris.
El ne l’osot araisuner,
e il dutot a li parler,
505 fors tant que il la mercia
del present qu’el li enveia,
unkes mes n’ot aveir si chier.
Ele respunt al chevalier
que de ceo li esteit mult bel ;
510 pur ceo li enveia l’anel
e la ceinturete altresi,
que de sun cors l’aveit saisi ;
ele l’ama de tel amur,
de lui volt faire sun seignur ;
484 H as — 488 H deueit sa fille (—1) — 504 H dute (—1) — 510 H e pur (+1) — 511 H ceinture (—1)
486 cheualer de utre — 487 lautre ; lescheker — 488 enseigner — 490 Le ; mut — 491 seer — 493 cheualer — 494 ben aquinter — 495 fere ; mut — 496 ad — 497 escute — 498 sires — 499 mut ; lee — 500 Dreseie — 501 autres — 502 de amur — 503 Ele ; areisuner — 505 ke — 506 que ele — 507 vnc — 509 mut — 510 enueat — 511 autresi — 512 seisi — 513 lamat
