Or est icy à notter que quand d’vn angle
![](http://upload.wikimedia.org/wikipedia/commons/thumb/c/cb/Euclide-Henrion-1632-p25a.jpg/200px-Euclide-Henrion-1632-p25a.jpg)
de quelconque figure quadrilatere on tire une ligne droicte à l’angle opposé, cette ligne est appellée diametre par aucuns, & diagonale par d’autres, ainsi au quadrilatere ABCD la ligne BD, menee de l’angle B à son opposé D est dicte diagonalle, ou diametre.
35. Lignes droictes paralleles, sont celles qui estans sur un mesme plan, & prolongées infiniment de part & d’autre ne se rencontrent iamais.
Afin que les lignes droictes soient dictes paralleles, ou equidistantes, il ne suffit pas qu’estans prolongées infiniment de part & d’autre, elles ne viennent iamais à se rencontrer, mais il est aussi necessaire qu’elles soient en une mesme superficie plane : Car plusieurs lignes droites n’estans en une mesme superficie, pourroient bien estre prolongées à l’infiny & ne le rencontrer iamais, lesquelles toutesfois ne seroient dites parallèles. Comme par exemple, si deux lignes droictes posees de travers au milieu de l’air ne se touchent point, bien qu’elles soient prolongées tant qu’on’voudra, elles ne se rencontreront iamais, & toutesfois el-
![](http://upload.wikimedia.org/wikipedia/commons/thumb/0/06/Euclide-Henrion-1632-p25b.jpg/200px-Euclide-Henrion-1632-p25b.jpg)
les ne seront pas dictes paralleles. Parquoy les deux lig. droictes AB, & CD, lesquelles sont en une mesme superficie plane, & qui estans prolongées à l’infiny tant de la part de A, C, que de B, D, ne se rencontrent iamais, seront dictes lignes paralleles.
Or icy finissent les definitions du premier livre d’Euclide : Mais d’autant qu’en ce mesme livre est souvent parlé de parallelogramme, & de leurs complemens, lesquels Euclide n’a point definy, nous adjousterons icy leurs definitions.
36. Parallélogramme, est une figure quadrilatere qui a les costez opposez parallels, ou equidistans.
Telle figure est tousiours l’une de ces quatre : Quarré, Quarré long, Rhombe, & Rhomboide, car elles ont toutes leurs costez opposés parallels.
37. Mais quand en un parallelogramme on mene un diametre, & deux lignes droictes paralleles aux costez lesquelles couppant iceluy diametre à un méme poinct, divisent le parallelogramme en quatre autres parallelogrammes ; ces deux là par lesquels le diametre ne passe