temps avant le Sarrasinesme avoyent receu la religion Catholique pour quitter l’Arrianisme. D’autres sont d’advis que ces Gahets ou Capots, sont issus des reliques des hérétiques Albigeois, excommuniez par censure apostolique, et que ceste lepre interieure leur est ainsi demouree, et demeure a perpetuité en signe de la desobeissance. Or laquelle que ce soit de ces raisons, si est-ce que pour dire vray, ce peuple n’est guere friant des Eglises, et ne frequente le divin service que par maniere d’aquit : aussi est il enterré ailleur que le reste des Chrestiens, et presque sans nulle solennité : et qui plus est quelque part qu’il soit, il est povre, vivant du jour a la journée, serf de chacun, et n’osant respondre au moindre du peuple qui l’injurie, et s’il y en a quelqu’un de riche (ce qui n’advient que rarement) on ne voit guere que ses enfans heritent de sa substance, si ce n’est du meuble que tout le monde abhorre comme la peste : qui me fait penser que ce soit pour vray ceste race Giezite, et Juifve Chrestienne par le commandement de quelque Prince, laquelle porte encor la penitence du peché de leur chef : et m’estonne que nul des anciens aye remarqué chose tant segnalee que de voir par toute une grande Province, n’y avoir presque ville, ny village, et sur tout en Bearn, et Bigorre, où il n’ayt quelque famille de ces Charpentiers separez du corps, et société des autres citoyens : et que la chose s’estant ainsi escoulée sous silence, et les modernes en ignorans la cause, ces hommes cependant n’ont peu gaigner l’heur d’estre receuz parmy les autres, tant la main de Dieu les a tenus de prez, et tant sa parole est veritable, et infaillible. Je laisse aux gents de meilleur esprit que le mien, le discours plus secret de ces choses, me suffisant de vous avoir touché ce que j’ai veu, et que nul (que je sçache) avoit jusqu’aujourd’huy mis en evidence[1]. »
- ↑ La Cosmographie universelle de tout le monde… Auteur en partie
