fussent gens de bonne chere. Un galant homme qui se trouva de la compagnie, pour ne pas laisser perdre ce plaisant mot, en fit sur le champ ce quatrain :
Un ignorant que les destins
Font un juge des plus notables
Croit que les loix des douze Tables
Sont faites pour les grands festins.
Apres le dîner, ayant suivy ce president, qui entroit en son cabinet pour y examiner le plan d’une maison qu’il vouloit faire bastir, Belastre le prit apres luy pour le voir, faisant semblant de s’y connoistre ; mais, ayant apperceu au bas une ligne divisée en plusieurs parties, avec cette inscription : Eschelle de quinze toises : Vrayement (dit-il), pour faire une si grande eschelle, il falloit de belles perches. Il luy arriva aussi un jour de demander à un conseiller, quand le roy estoit en son lit de justice, s’il estoit entre deux draps ou sur la couverture.
Mais pour revenir à son domestique (car on pourroit faire des livres entiers de ses burlesques apophtegmes), il luy vint une apprehension que cette demoiselle de Prehaut ne luy fist signer quelque papier (c’est ainsi, comme j’ay dit, qu’il appeloit tous contracts), et qu’elle ne surprist une promesse ou un contract de mariage. Il luy avoit promis son alliance avant qu’il fust instalé, mais lors qu’il crut n’avoir plus affaire d’elle, il la dédaigna, et ne voulut plus tenir sa promesse. Comme il ne sçavoit pas lire, du moins l’escriture ordinaire de la pratique, il ne signoit que sur la foy d’un sifleur qu’il avoit ; mais, la deffiance estant fort naturelle aux méchans et aux ignorans, il eut peur qu’il ne fust gagné par cette femme, qui passoit pour fort artificieuse. Voicy
