tie[1] que on trueve assés aux apoticaires. Et se l’ongle estoit si fort et si endurcie que pour cela ne peust garir, ayez une aguille et la pliez au milieu que elle soit courbe et prenez bien subtilment celle chair qui est sus l’ueil et la tiriez hault et puis la coupez d’un rasoer ; mes prenez bien garde que l’aguille ne touche à l’ueill. Et ceste chose scevent bien fere les mareschauls. Quar einsi comme un ongle se tret à un cheval aussi se tret à chien.
Et aussi avient à chiens autre maladie ès oreilles, qui leur part de reume de la teste. Quar ils se gratent tant du pié derrière, qu’ils y font venir ordure, et leur giètent ordure les oreilles ; aucune fois en devienent sours. Prenez du vin tiède et à un bau drap, à tout vostre doy, li lavez l’oreille trois ou quatre fois le jour. Et puis quant vous li arez lavé, si li getez dedens trois goutes d’uille rosat avec autres trois goutes d’uille de camamille tièdes, meslez tout ensemble et ne li leissiez mie grater ne froter l’oreille d’une grant piesse et ceci li continuez jusques tant quil soit gary.
Aussi ont les chiens autre maladie qui leur part de rieume, c’est qu’ils ont le morvel ès narrines comme un cheval et ne pevent rien sentir, et au derrenier aucuns en muerent. Fetes bouillir du mastic et d’ensens bien polvérisé en yaue et de une chose qui s’appelle estoracis calamita[2] et de lapda et de camamille et de melilot, de anthos[3], de calament[4], de nigella[5] et de rute[6], de mente et de sauge, et fetes tenir les narines du chien sur le pot où cela bullira affin quil en ressoive la fumée par les narines, et li fetes einsi tenir une grant piesse, trois ou quatre fois chascun jour jusques tant qu’il soit gari. Et cecy est bon à cheval quant est morveuls et aussi à homme qui est fort enreumé.
