Aussi ont chiens autre maladie qui leur vient en la gorge, et aussi fet aux hommes qui ne leisse transgloutir ce qu’ils menjent ainsi avient qu’ils le jetent arrière ; et aucunefois ont le mal si fort, qu’ilz ne pevent rien avaler dedenz le corps et muerent. La meilleure médicine qui soit, si est les leissier aler partout là ou il leur plaira et leissier mangier tout quant qu’ils voudront ; quar aucunefois les choses contraires aproufitent bien. Et quant on leur voudra donner à mengier, si leur donne de la char bien menuement taillée et picquée mise en brouet, ou en let de chièvres ou de vaches petit à petit, afin qu’ilz puissent passer sans travail, et ne li en donnent mie trop à une fois, affin qu’ils puissent mieulx digérir. Aussi le buerre et les œufz leur font grant bien.
Aussi aucuneffois les hurtent du pis ou des jambes ou des piés ; et quant c’est desjointés des espaules ou des jambes ou des piés qu’ilz ayent mises hors de lieuz, le meilleur remède qui soit, si est fère les y retourner à un homme qui bien le saiche faire à leur droit, et puis metre dessus estoupes maillées ou blanc de l’euf et le leissier reposer jusques tant qu’il soit gary. Et s’il y ha os rompu, on le doit retourner au plus droit qu’il porra, l’un os en droit de lautre. Et lier les o les estoupes suzdites et quatre astelles bien liées l’une dessus, l’autre dessous et les deux aux costez, affin que les os ne se desjunhent ; et remuer la liasse de trois en trois jours naturels. Et donner li à boyre du jus des herbes qui s’appellent consolidas de maiour[1] et de minour, et de mesler en brouet, ou en ce quil mengera ; quar cela li fera consolider les os.
Chiens aussi se perdent voulentiers par les piés ; et si aucunesfois ils les ont eschaufés, prenez du vin aigre et de la suye qui est ès cheminées et les en lavez les piez chascun jour, jusques tant qu’ilz soient garis ; et s’ils ont les soles batues et se
- ↑ Consolidas de mayour et de minour, grande consoude, simphyium majus, oreille d’âne ou consire, piaule de la famille des boraginées ; petite consoude, brunelle.
