Chapitre soixante-septième.
Ci devise comment on puet prendre les lous à la croupie.
ussi puet hon prendre les lous à la croupie en ceste manière : hon doit tuer une beste là où il li semblera mieux que lous doivent demourer, et fère train de toutes parts ès buyssons et forès à l’environ et tirer là où la charroigne sera ; et les doit lessier manger une nuyt. Et quant il saura qu’ilz aront assez mangé, la seconde nuit, il doit pendre la charroigne en un arbre ; et à la tierce nuit il doit abatre la char et tendre, einsi comme le tret d’une pierre loing de la charroigne, trois pièces de roiz audesoubz du vent. Et doivent estre trois compaignons derrière la charroigne et les roiz ; des deux bouts des roiz et ou milieu un, un pou loing. Et quant les lous venront pour manger, et ilz seront entre la charrogne et les hommes, les hommes se doivent lever et crier après le lou et jeter bastons après luy et le fère férir ès roiz et le tuer ou prendre vif s’ilz veulent. Toutevoyes, sur toutes choses, doivent regarder le vent. Aucuns getent levriers après ; mes je l’ay bien veu retourner, quar les levriers le hastoient trop.
