Chapitre soixante-huitième.
Ci devise comment on puet prendre sangliers et autres bestes quant ilz vont à leurs menjures ou vianders ès champs ou vergiers.
ussi le puet il prendre fesant une fosse. Et quant celuy qui le voudra chassier verra qu’il vient chescunc nuyt en vergier viander des pommes, ou en champ viander des jarbes du blé, il doit assembler les jarbes ou les pommes en un lieu et fère tout autour le hault d’un coude ou de fust ou de pierres, affin que la beste quant vendra mengier convieinhe que saille pardessus cela. Et quant la beste vendra à son vianders ou menjures y verra que les pommes ou les jarbes en seront levées, il les ira partout querant. Et quant il les trouvera, il sautera par dessus et les ira mengier. Et celuy qui le voudra chassier, quant il verra qu’il y ait esté trois ou quatre nuiz, il doit fère une fosse entre les pommes et là où il saute près couverte de petites busches, et dessus des herbes. Et quant il cuydera saillir comme les autres nuiz, pour aler ès pommes, il cherra dedans.
