se ne feust lesperance que iay en toy ie me feusse perdu piece a, maiz ie pense que tu ne delaissez ceulz qui esperent en toy ; tu es mon dieu doulz benigne et pacient, ie fueille et vanite homme vivent, ma vie est vent sur la terre ; ne te courrouces Sire sur mes pechiez car ie suy pupil et tu cognois ma fragilite, ne vueil les monstrer ta force inexplicable contre la fueille que le vent emporte. Iay ouy Sire et sentu ta misericorde que tu ne veulz ma perdicion par quoy ie te pri que tu ne permetes a avoir seigneurie ce que tu ne fis a ta creature la quele tu fis. Se tu ne veulz de ma perdition qui deffents a toy qui puez tout, de mettre moy a salvation ? Se tu veulz tu me puez sauver, et se ie vueil par moy sanz toy ie ne puis, la voulente est en moy maiz leccomplir ie ne puis trouver ne la voulente ie ne puis avoir se tu ne le fais, et ce que ie vueil et puis ie ne cognais se tu ne le menseignes car en ta voulente sont toutes choses, ne nulz nest qui puisse le contraire faire en moy. Donc sire, soit faite ta voulente, qui appelle ton nom, ne soit perie sil te plaist ceste creature qui est faite par ton saint nom.
XXXV
Grans sont tes iugemens sire dieu iuge droiturier qui juges et quites ceulz quil te plaist ; lesquielx quant ie le pense ie tremble de touz mes os, car nul homme vivant nest asseure sur la terre que nous ne te servons piteusement ne chaste en timour ; ne nous esleescons en tremour si ne nostre prelaz religieux ne seigneurs ne subges car nul ne se puet glorifier devant toy, maiz trestoute gent a grant paour te servent. Comme tout homme soit ignorant s’il est digne d’amour ou dyre, de noz pères la quele senz grant paour ie ne recorde estre monte iusques es cieulx : premièrement des quielx leur arme est es parfons dabysme et aussi ay ie ouy dire le contraire ; et ie ay veu mourir les vivans et les mors de iniquite ressusciter, car publiques pecheurs et publiques femmes pecherresses as fait es cielx habiter et les filz de ceulz as gete en tencbres ; c’est-à-dire que les religieux seigneurs et autre manière de gent appareillez en estat de bien faire, et destre ou regne des cieulx, ont fait par leurs pechiez et par ton jugement quilz sont envenfer, et, par le contraire pecheurs
