et pecherresses se sont retournez a toy : tu sire ne desires fors ceulz qui te désirent de quelque estat que soyent lesquielx tu faiz dignes de toy saincts et beneures. Ce sont ceulz que toutes les choses du monde reputent comme boe pour ce que puissent seulement toy gaingner, c’est le bie net lonneur que tu as donne a homme par quoy tu soyes honnoure et ton nom par touz temps.
XXXVI
Ma esperance mon Dieu et ma salut a toy sire ie me rent et cri mercy comme le plus vil pecheurs et le plus vil maleureux que ie croy qui onques fust ; et sire ce que ie disces tu mielx que ie ne fais, mais pour ce quil te plaise avoir pitié de moy, non en nulle manière ainsi comme ie doy maiz ainsi comme ma feble char puet ie te supplie qu’il plaise à ta sainte et doulce misericorde rendre a moy mon salut ; cest ta grace et ta doulce cognoissance. Las sire et quans de biens er quans de miracles as tu fait pour moy pourreture sur toutes ordures, ver des vers, opprobre non pas des hommes tant seulement maiz de toutes autres creatures, lesquelles graces et toy qui pis est iay perdues par mes horribles vilz et deshonnestes pechiez. À pechiez que doulce et legiere chose estes de faire et très gréveuse et perilleuse estes de yssir, car puis que un homme est cheu en grans pechiez dont il a courrouce notre sire de soy relever et de retourner vers toy, est il neant se tu meismes doulz dieu ne le fais et si ne te plaist pas à le faire chascune fois dont moult de gens sont perduz. Moulz est donc merveilleusement male chose pechiez car on en pert corps et arme et toute bonne renommee, car puis que on a perdu la grace de Dieu les fais de lomme ne peuvent riens valoir. Pechiez ie vous puis bien comparer a la morsure d’un chien enragie car la morsure est petite maiz le venim est très grant, car premièrement il emfle, puis après il rent grant douleur et puis vient en fievre et en pert le mangier et le boire, puis vient en frenaisie et en descognoissance de toutes choses et en la fin sensuit la mors. Certes ainsi est il de pechie car quant on le fait il semble petite chose, maiz apres il emfle, car a peinnes sera un pechie quil natraye un autre ou celluy meismes autrefois, tout ainsi comme lenfleure atrait les
