LXV
Li quens Rollanz en apelet Carlun :
« Dunez-mei l’ arc que vus tenez el’ puign.
« Mien escientre, ne l’ me reproverunt
« Que il me chedt cum fist à Guenelun
« Vostre guanz destres, quant reçut le bastum. »
Li Emperere en tint sun chief enbrunc :
Si duist sa barbe e detoerst sun gernun ;
Ne poet muer que de ses oilz ne plurt.Aoi.
LXVI
Enprès iço, i est Naimes venuz :
Blanche ont la barbe e lut le peil canut.
Meillur vassal n’ont en la curt de lui,
E dist à l’ Rei : « Bien l’avez entendut ;
« Li quens Rollanz il est mult irascuz :
« De sun talent est il pesmes e durs.
« La rere-guarde est jugiée sur lui ;
« N’avez barun ki jamais la remut.
« Dunez li l’arc que vus avez tendut,
« Si li œuvez ki très bien li aïut. »
Li Reis li dunet, e Rollanz l’ad reçut.Aoi.
LXVII
Li Emperere ad apelet Rollant :
« Bels sire niés, or savez veirement,
« Demi mun ost vus lerrai en présent :
« Retenez les, c’ est vostre salvement. »
Ço dit li Quens : « Jo n’en ferai nient.
« Deus me cunfundet, se la geste en desment !
« Vint milie Francs retiendrai bien vaillanz.
« Passez les porz trestut soürement :
« la mar prendrez nul hume à mun vivant. »Aoi.
791. Lacune comblée. Voir la note du t. 318.