« Li reis Marsilies de nus ad fait marchiet,
« Mais as espées l’estuvrat eslegier. » Aoi.
XCVII
As porz d’Espaigne en est passez Rollanz
Sur Veillantif, sun bon cheval curant ;
Portet ses armes, mult li sunt avenanz ;
E sun espiet vait li ber palmeiant,
Cuntre le ciel vait l’amure turnant,
Laciet en sum un gunfanun tut blanc ;
Les renges d’or li batent jusqu’as mains ;
Cors ad mult gent, le vis cler e riant.
E sis cumpainz après le vait sivant ;
E cil de France le clciment à guarant.
Vers Sarrazins reguardet fièrement,
E vers Franceis e humles e dulcement.
Si lur ad dit un moi curteisement :
« Seignurs baruns, suef pas alez tenant.
« Cist paien vunt grant martirie querant ;
« Encoi avrum un eschec bel e gent :
« Nuls reis de France n’ont unkes si vaillant. »
A cez paroles vunt les oz ajustant. Aoi.
XCVIII
Dist Oliviers : « N’ai cure de parler.
« Vostre olifant ne deignastes suner,
« ’Ne de Carlun mie vus nen avrez ;
« Il n’en set mot, n’i ad culpe li ber.
« Cil M là sunt ne funt mie à blasmer.
« Kar chevalchiez à quanque vus puez,
« Seignurs baruns, el’ camp vus retenez ;
" Pur Deu vus pri, bien seiez purpenset
« De colps fefir, e receivre e duner.
« L’enseigne Carle n’i devum ublier. »
A icest mot unt Franceis escriet.
Ki dunc oïst Munjoie demander,
