CXVIII (??)
Si cum Gualtiers fut ad els ajustez,
Païen l’asaillent envirun de tuz lez.
Sis forz escuz li est fraiz e quassez,
Sis blancs osbercs rumpuz e desafrez,
E il meïsmes de quatre espiez naffrez.
Ne l’ pout suffrir, quatre feiz s’est pasmez.
Voeillet o nun, s’en est de l’ camp turnez.
Si cum il pout ad le munt avalet.
Rollant apellet : « E ! ber, si m’ succurez. » Aoi.
CXIX
La bataille est merveilluse e pesant.
Mult bien i fiert Oliviers et Rollanz,
Li Arcevesques plus de mil colps i rent,
Li duze Per ne s’en targent nient
E li Franceis fièrent cumunement.
Moèrent païen à’ milliers e à cenz.
Ki ne s’enfuit de mort n’i ad guarant,
Voeillet o nun, tut à laisset sun tens.
Franceis i perdent lur meillurs guarnemenz,
Lur forz espiez e lur lances trenchanz,
E gunfanuns blois e vermeils e blancs :
De lur espées si sunt fruisiet li brant.
Perdut i unt tanz chevaliers vaillanz !
Ne reverrunt ne pères ne parenz,
Ne Carlemagne ki as porz les aient.
En France en ad mult merveillus turment ;
Orez i ad de tuneire e de vent, -
Pluie e gresilz desmesuréement.
Chièdent i fuildres e menut e suvent ;
E terremoete ço i ad veirement
