CXLVII
Felun paien i fièrent de lur lances
Sur cez escuz e cez helmes ki flambent :
Fers e aciers en rent grant consunance,
Cuntre le ciel en volet fous e flambe.
Sanc e cervele ki dunc veïst espandre !
Li quens Rollanz en ad doel e pesance,
Quant veit murir tant bon vassal catanie.
Or, li remembret de la tere de France
E de sun uncle le bon rei Carlemagne.
Ne poet muer tut sun talent n’en canget.Aoi.
CXLVIII
Li quens Rollanz est entrez en la presse,
Ki de férir ne finet ne ne cesset.
Tient Durendal, sun espée qu’ad traite,
Rumpt cez osbercs e desmailet cez helmes
Trenchet cez cors e cez puignz e cez testes ;
Tels cens paiens ad getez morz à tere.
Nen i ad un vassals ne se quidet estre.Aoi.
CXLIX
Oliviers est turnez de Valtre part ;
De l’ bien férir si ad pris un asalt.
Trait Halteclere, que mult forment amat :
Suz ciel n’en ad meillur, fors, Durendal.
Li Quens la tient g forment se cumbat ;
Li sancs vermeilz en volet jusqu’ as braz.
« Deus : " dist Rollanz, « cum cist est bons vassals !
« E ! gentils quens, tant pruz e tant leials,
« Nostre amistiet en cest jur finerat,
« Par grant dulur hoi se départirat.
" E l’Emperere plus ne nus reverrat ;
« En dulce France jamais tel doel n’avrat.
