« Ne fait damage ne de mei ne d’altrui. »
Après, escriet Rollant qu’il li aïut. Aoi.
CLXXIV
Oliviers sent qu’il est à mort naffrez,
De lui vengier jamais ne li iert sez ;
De Halteclere lur voit granz colps duner,
En la grant presse or i fiert cume ber,
Trenchet cez hanstes e cez escuz buclers,
E piez e puignz, espalles e costez.
Ki lui veïst Sarrazins desmembrer,
Un mort sur l’altre à la tere geter,
De bon vassal li poüst remembrer.
L’enseigne Carle n’i voit mie ublier,
Munjoie escriet e halternent e cler.
Rollant apelet sun ami e sun per :
" Sire cumpainz, à mei kar vus justez.
« A grant dulur ermes hoi desevret. »
Li uns pur l’altre si cumencet à plurer. Aoi.
CLXXV
Rollanz reguardet Olivier à l’ visage : -
Teinz fut e pers, desculurez e pales ;
Li sancs tuz clers fors de sun cors li raiet,
Encontre tere en chièdent les esclaces :
« Deus ! » dist li Quens, « or ne sai jo que face.
« Sire cumpainz, mar fut vostre barnage !
« Jamais n’iert hum vostre cors contrevaillet.
« E ! France dulce, cum hoi remeindras guaste
« De bons vassals, cunfundue e desfaite !
« Li Emperere en avrat grant damage. »
A icest mot sur sun cheval se pasmet. Aoi.
CLXXVI
As vus Rollant sur sun cheval pasmet,
E Olivier ki est à mort naffrez ?
