Siglent à fort e nagent e guvernent.
En sum cez maz e en cez haltes vernes,
Asez i ad carbuncles e lanternes ;
Là sus amunt pargetent tel luiserne
Que par la noit la mer en est plus bele.
E, cum il vienent en Espaigne la tere,
Tuz li païs en reluist e esclairet.
Jusqu’à Marsilie en parvunt les nuveles
Que Baliganz est entrez en sa tere,
Tel ost ameinet, n’iert veüe plus bele ;
Dis e set rei, envirun, la cadelent.
Or gart Deus Carle e la veire Paterne :
Bataille avrat e duluruse e pesme. Aoi.
CCXXI
Gent paienur ne voelent cesser unkes :
Issent de mer, vienent as ewes dulces ;
Laissent Marbrise e si laissent Marbruse ;
Par S’ebre amunt tut lur navilie turnent.
En sum ces maz e en cez vernes lunges
Asez i ad lanternes e carbuncles :
Tute la noit mult grant clartet lur dunent.
A icel jur vienent à Sarraguce. Aoi.
CCXXII
Clers est li jurz e li soleilz luisant.
Li Amiralz est issuz de l’ caland :
Espaneliz fors le vait adestrant ;
Dis e set rei après le vunt sivant ;
Cuntes e dux i ad bien ne sai quanz.
Suz un lorier, ki est en roi un camp,
Sur l’herbe verte getent un palie blanc ;
tin faldestoel i unt mis d’olifant ;
Desur s’asiet li paiens Baliganz ;
Trestuit li altre sunt remés en estant.
