Li Emperere, par sa grant poestet,
2610.Vii. anz tuz pleins ad en Espaigne estet ;
Prend i castels e alquantes citez.
Li reis Marsilies s’en purcacet asez ;
A l’ premer an fist ses brefs seieler,
En Babilonie Baligant ad mandet :
2615(Ço est l’Amiralz, li velz d’antiquitet,
Tut survesquiet e Virgilie e Omer),
En Sarraguce l’alt succurre, li bers ;
E, s’il ne l’ fait, il guerpirat ses deus
E ses ydeles que il soelt aürer,
2620Si receverat seinte chrestientet,
A Carlemagne se vuldrat acorder.
E cil est loinz, si ad mult demuret.
Mandet sa gent de .xl. regnez ;
Ses granz drodmunz en ad fait aprester,
2625Eschiez e barges e galies e nefs.
Suz Alixandre ad un port juste mer :
Tut sun navilie i ad fait aprester…
Ço est en mai, à l’ premer jur d’estet,
Tutes ses oz ad empeintes en mer. Aoi.
2630Grant sunt les oz de cele gent averse :
Siglent à fort e nagent e guvernent.
En sum cez maz et en cez haltes vernes,
Asez i ad carbuncles e lanternes ;
Là sus amunt pargetent tel luiserne
2635Par la noit la mer en est plus bele.
