Page:Héry - Fables créoles et exploration dans l'intérieur de l'île Bourbon, 1883.djvu/59

Pour li parpar son dizéner ;
(Traite ein zens Saint-Dinis, ma foi! grand l'ouvraze.)
Ça qu'li n'en a d'meillèr li pourgal' pour donner.
Quand qu'li diz'ner l'est prêt, z'aut' dé l'assise à terre.
Li rat d'vill' l'alonz' sis bersac,
(L'était la plaç d'honnèr,) l'aut' li rat rest' darrière
Pour règl' son politess' prend gard' va fair' mic-mac;
Li serv' sis feill' banan' li sonz' ensembl' batate,
Mais li rat Saint-Dinis goût' ça li bout d'son dent.
Li pé pas envaler, li trouv' qu'li sonze y gratte,
Et pour manzer batat' , ma foi! n'a pas gourmand.
Li pauvr' rat 'bitation (li la 'mazin' bien faire),
L'a vouli mett' à tabl'morceau tang' boucané
Qu'li l'était gard' l'année entière,
L'était dir comm' di couir tanné.
A pein' li rat gros-têt' la senti l'odèr tangue,
La lève ein coup, la sauv' dihors boucan,
Son l'estomac la r'mont zisqu'à son langue :
"Moi mal au coer, li dit ça prendre à moi souvent ;
"Mon cer ami, bien grand merci vout' tangue,
"Mon tour aussi moi va régale à vous ;
"Sivre à moi Saint-Dinis, quitte ein pé vout' zang-zangue,
"N'a pas zist' vous rester comment vié toulouroux
"Dans n'mitant vout' grand bois ; allons nous fair' bombance,
"Sivre à moi Saint-Dinis, voir tout' quéq'çôs' nouveaux ;
"Allons nous prend' la dilizence ;

 "Moi fair' manze à vous bon morceaux.
Zab! zab! zab! z'aut y court, z'aut arriv' la grand'route,
Z'aut' cacièt' proç la case à Prosper Valentin.
Li rat d'Saint-Dinis y dit : "La voitire vient! Acoute…
"Acout' sonnett' cival, acout' …drelin, drelin!…"
Pendant qu'Moussié Zilien la d'scend boir son la goutte,
Li dé z'amis la coul' sous l'paquets vitement…
Fouett' cocer, rondement comm' l'armée en déroute ;
Z'aut' l'arriv' Saint-Dinis à proç soleil couçant.
A terr' z'aut' dé …z'aut y gliss' sous la paille
Pour laisser timber la clarté.
Dès qui fait noir : "Allons nous fair' ripaille,"
Commenç dir' li rat d'vill' fité.
"L'Hôtel Zoinvill' nous pé vanté.
"Zistement tout li capitaines
"Azourd'hi l'a donn' grand diner ;
Nous va trouver li tabl' tout' pleines,