Orig. – Arch. municip. de Bordeaux. Copie transmise par M. le secrétaire général de la ville.
Messrs, Je vous ay escript cy-devant et prié de n’empescher les srs Deaste et Acesat, mes fermiers generaulx, et leurs commis desputez, de charger devant vostre ville de Bordeaulx jusqu’au nombre de deux cents tonneaulx de bled provenant de mon domaine, afin qu’ils aient meilleur moyen de nous secourir de finances. Et desirant que la premiere priere que je vous en ay faicte ait lieu, je vous ay bien voulu faire ceste recharge, pour vous prier encore ung bon coup n’empescher les dicts Deaste et Acesat et leurs dicts commis et depputez, à charger ledit bled. Et vous ferés, en ce faisant, chose que j’auray bien agreable et que je recognoistray en ce que me vouldrés entretenir, d’aussi bon cœur que je prie le Createur vous donner, Messrs, sa saincte grace. Escript à Agen, le vje jour d’octobre 1576.
Orig. – Arch. de la famille Forget de Fresne. Communication de M. le chevalier Artaud de Montor, membre de l’Académie des inscriptions et belles-lettres, allié de la famille Forget.
À FORGET,
Forget, Je vous envoye deux blancz-signez pour, en vertu d’iceulx, recepvoir du tresorier ordinaire des guerres la somme de sept mille livres tournois pour les estats et entretenement de quarante hommes d’armes et soixante archers, que le Roy mon seigneur m’a cy-devant accordez pour ma garde durant le quartier de juillet, aoust et septembre. Je vous prie, à ceste cause, en faire telle diligente pour-
