ment d’une partie si legitimement deue soit si long-temps differé. J’escris cependant aux Esglises de Provence de fournir les dicts deux mille et tant d’escus, et mande à Forget de vous faire delivrer toutes contraintes. Et lorsque l’occasion s’offrira d’avancer l’entier payement, je vous feray apercevoir avec quelle affection je veulx embrasser tout ce qui vous peut apporter de l’utilité : priant sur ce le Createur vous tenir, Messieurs, en sa saincte garde. De Nerac, ce xxiije decembre 1582.
Orig. — Arch. de M. le comte H. C. de Meslon. Envoi de M. le secrétaire général du département de la Gironde.
À MONSR DE MESLON,
Monsr de Meslon, Ayant entendu que le soldat d’Allençon [dict] la Ville, qui avoit esté accusé de certaine intelligence et entreprinse au prejudice du general de la Religion, et du particulyer de [Montsegur], est tousjours detenu prisonnier, nonobstant son innocence, qui a esté recogneue et adverée en mon conseil, je vous ay bien voulu escrire ceste-cy pour vous dire que je desire qu’il soit mis en liberté ; et je vous prie de le faire delivrer, incontinent la presente receue, sans souffrir ny permettre qu’il luy soit faict aucun tort ny deplaisir, afin qu’il se puisse retirer seurement et librement en son pays ; et vous ferez chose qui me sera fort agreable. Et m’asseurant qu’effectuerés en cella mon desir et intention, prieray Dieu, Monsr de Meslon, vous avoyr en sa saincte garde. De Nerac, ce xxvje jour de decembre 1582.
