Page:Homère - Les dix premiers livres de l’Iliade trad. Salel 1545.djvu/134

Creu pres de l’eau, que le fort Charpentier
De ſa Coignée abbat à Terre entier :
Pour en apres en faire belles Roues
De Chariot, boys propre pour les boues :
Et puis long temps le laiſſe deſſecher
Pres de la Rive, ou ſur quelque Plancher.
    Voyant cecy le puiſſant Antiphus
Filz à Priam, tout de douleur confus
Pour le venger ſon beau Dard eſbranla,
Cuydant frapper Ajax : mais il vola
Sans le toucher, & vint bleſſer au Ventre
Leucus amy d’Vlyſſés, & luy entre
Si tres avant dans les boyaulx, & Leine,
Que de ce coup il reccut mort ſoubdaine.
    Quand Vlyſſés veit occis ſon amy,
Plein de fureur il ſe jecte parmy
Les premiers Rengz des Troiens, & adviſe
Sur qui pourroit faire plus belle empriſe.
Les ennemys luy feirent bien toſt place :
Et ſ’eſcartoy ent voyans ſa fiere audace.
Ce nonobſtant, ſon javelot envoye
Trop rudement, & trouvepar la voye
Democoon du Roy Priam Baſtard,
Qui ſ’en fuyoit, mais c’eſtoit ung peu tard :
Car de ce coup les Temples luy percea
De part en part, dont la vie laiſſa.
Le Roy Priam l’avoit long temps tenu
En Abidos : dont il eſtoit venu,
(Y delaiſlſant les Chevaulx & montures
Dudict Priam) pour cercher aduentures.