Page:Homère - Les dix premiers livres de l’Iliade trad. Salel 1545.djvu/142

Car en fuyant bleſſé ſut par derriere :
Dont il tumba tout mort en la poulſiere.
    Merionés tua le Charpentier
Dict Phereclus, ſi duict en ſon meſtier,
Qu’il n’eſt ouvrage excellent ou ſubtil,
Qu’il ne taillaſt avecques ſon ouſtil :
Tant il eſtoit de Minerve la Saige
Favorizé, par divin avantage.
C’eſtoit celuy qui à Paris Troien
Dreſſa les Nefz, inſtrument, & moyen
De tant de maulx : & qui à ſa Cité
Forgea malheur, & dure adverſité :
À ſoy auſſy pour n’avoir entendu
Le vueil des dieux, qui lavoyent defendu
Or mourut il ſans en avoir revanche
D’ung coup de Dard, rcecu dedans la Hanche
Qui luy paſſa tout oultre en la Veſſie,
Dont il ſentit ſoubdain l’Ame tranſſie :
Et cheut en bas ſur ſes Genoux, pleurant
Amerement quand il ſe veit mourant.
    Megés auſſy vaillamment combatif :
Car Phegeus à la mort abbatit.
Ce Phegeus eſtoit preux & gaillard,
Et Filz baſtard d’Antenor le Vieillard,
Lequel jadis Theano belle Mere
Avoit nourry, pour complaire à ſon Pere,
Treſcherement, & en ſi grand eſtime,
Comme ung des liens Aiſné & légitime.
La receut mort, par douloureux meſchef,
D’ung coup de Dard, qui entra dans ſon Chef
Iuſques aux dentz, dont cheut emmy la Plaine :
La Bouche ayant de Fer & de Sang pleine.