Apres cecy l’Oſt Troien perdit cueur :
Et ſ’enfuyoit, dont le Gregeois vainqueur
Les pourſuyuoit. Et lors les Capitaines
Monſtrerent bien leur proveſſes haultaines.
Agamemnon principal chef de Guerre,
Meit ung grand Duc des Alizons par terre
Dict Odius, luy donnant en l’Eſchine
Si rude coup, que parmy la Poitrine
Paſſa le Dard : dont il luy feit laſcher
Son Chariot, & en bas treſbuſcher.
Et ouyt lon clerement le murmure
Du corps tremblant, & de ſa riche Armure.
Idomenée occiſt auſſy Pheſtus
Filz de Meon, excellent en vertus.
Ce diſt Pheſtus perſone tres gentile,
Avoit laiſſé ſa Province fertile
Dicte Tarné, pour honeur acquérir,
Mais contrainct : fut ſubitement mourir,
Car le Cretois luy vint donner tout droict
Du javelot dedans le coſté droict.
Si cheut en bas, de tenebres ſurpris
De noyre mort, duquel le corps fut pris
Par les Souldards, & ſoubdain deſpoillé :
Et puis laiſſe tres ſanglant & ſoillé.
Menelaus monſtra bien ſa vaillance
D’aultre coſté, car de ſa rude Lance
Il meit à mort Camandre le Veneur :
Auquel Diane avoit faict tant d’honeur
De luy bailler l’induſtrie & courage,
Pour aſſaillir mainte Beſte ſaulvage.
Mais la Déeſſe & ſon bel exercice,
D’Arc & Carquois luy fut lors mal propice :
Page:Homère - Les dix premiers livres de l’Iliade trad. Salel 1545.djvu/141
Cette page n’a pas encore été corrigée
