Page:Homère - Les dix premiers livres de l’Iliade trad. Salel 1545.djvu/168

Puis deſcendit en la partie extreme
Du petit Ventre : & lors il tumba bleſme.
    En meſme inſtant furent auſſy vaincuz
Par Eneas Crethon, Orſilochus :
Leſquelz avoient Dioclëus à Pere,
Qui habitoit en la Cité de Phere :
Riche, puiſſant, & de Race venu
Du noble Fleuve Alphée, tant cognu
Dans le Pays de Pyle,ou il derive,
En eſtendant ſa belle & large Rive.
Ceſt Alpheus, eut jadis pour Enfant
Orlilochus, qui fut Roy triumphant
Lequel apres eut à Filz legitime
Dioclëus le Prince magnanime :
Duquel eſtoient ces deux Filz deſcenduz,
Orſilochus, & Crethon, entenduz
Au faict de Guerre, autant que Perſonages
Du Camp Gregeois, au moins ſelon leurs cageſ :
Quipour ſe faire encor plus renommer,
Avoy eut ſuivy Agamemnon par Mer,
Iuſques à Troie, eſtimans grand honeur
De batailler ſoubz ung tel Gouverneur.
Mais tout ainſi qu’il advient quelque fois,
Que deux Lions nourriz au coing d’ung Boys
Par la Lionne, ayans faict grand dommage
Aux plus grans Parcz de tout le voiſinage,
Ores prenans ung Beuf, une jument,
Ou ung Mouton, ſeront finablement
Circonvenuz des Bergers, qui regretent
Leur bien perdu, & pour cela les guettent
Semblablement le courageux Enée,
Donna la mort & derniere iournée