Cette page n’a pas encore été corrigée
Qu’on fueillete diligemment les escrits de tous les autres Peres, pour voir si on les trouvera exempts d’erreur. Ceux de S. Cyprian soustiennent qu’il faut rebaptiser ceux qui abjurants l’heresie, avoient esté baptisez par les heretiques. Ceux du docte Origene en quoy n’ont-ils pas erré ? si on est curieux de voir le desnombrement des principales fautes, il ne faut que lire la docte epistre de S. Hierosme ad Avitum. S. Hilaire semble n’oster pas peu du merite de Jesus-Christ lors qu’il advance, que son sacré Corps n’estoit poinct capable de douleur, & que la faim, la soif, la lassitude, & le reste de nos infirmitez, n’avoient point esté en luy naturelles, mais Absumptæ, comme parle l’Escole.
