Our retourner au propos saincte radgonde fut mise entre mains de gens vertueux pour aprendre bien et honneur. mais avant que parler des meurs et vertuz qu'elle eut en son adolescence nous parlerons de ses enfances qui presidoient sa future perfection. Car (comme tesmoigne ledit sainct fortune) quant elle estoit avecques les petiz enfans de son aage ne parloit que de nostre saulveur jesuchrist :et desiroit venir le temps qu'elle peust souffrir martire pour l'honneur et reverence de luy. Quant elle avoit prins sa refection recolligeoit la reste de son manger puis ressembloit les petis enfans de son aage autant qu'elle en povoit trouver, et les faisoit seoir par ordre leur administroit l'eaue pour laver leurs mains, les servoit et bailloit a chascun sa portion Et apres, en la compaignee des filles de sa sorte alloit a leglise, et par ung jeune clerc nomme samuel faisoit porter davant elle une petite croix de bois : en la memoire du bon jesus. En cest estat et en chantant hympnes et pseaulmes entroit en l'eglise, et apres son oraison faicte, nectoyoit et mundoit la place tout autour de l'autier avecques ses vestemens, et la pouldre et terre pourtoit en lieu secret affin qu'on ne marchast dessus. C'estoient les enfances de la noble et saincte pucelle radegonde : bien esloignees d'aucunes petites filles d'aujourduy qui scavent plus de malice a cinq ou six ans que ne scavent aucunes femmes a vingt, qui advient par l'instruction des peres et meres. Lesquels ne leur aprennent que choses mondaines et dissolues, dont souvent fort scandalle et reproche quant elles perviennet en l'aage nubille.
Des meurs et vertuz de saincte radegonde. Et commant elle fut sobre en parler, humble et honteuse de honte virginalle. Chappitre.viii.
Vant que saincte radegonde eust l'aage de douze ans elle sceut lire et escrire et en l'aage de quinze ans sceut parler latin et francoys, aussi sceut tixtre broder en
