Page:Jean Bouchet - Histoire et cronicque de Clotaire.djvu/47

De la vie saincte radegonde

folio XI

saye et layne et faire toutes choses honnestes qu'on pouvoit demander en une fille, en sorte qu'elle oultrepassoit le scavoir de toutes les autres. Et qu'elle fust instruicte en la langue latine il appert assez par plusieurs epistres qu'elles a faictes et composées en latin, mesmement une qui est insérée au long en la cronique dudit sainct gregoire arcevesque de tours. Une aultre qu'elle envoya à l'abbesse saincte Cesare : lesquelles seront cy après au long insérées et translatées en leur lieu. Aussi j'ay veu par les euvres de sainct fortune aucunes epistres qu'il escripvoit à la dite saincte, lesquelles sont en mètre et en très beau et hault stille. Or pour retourner au propos ladicte saincte fut de si facille doctrine qu'elle eut tantost comprins ce qui luy estoit necessaire pour l'honnesteté de son royal estat. Et combien que naturellement fust de subtil et facil esprit et tres prompt à comprendre. Touteffoiz faisoit toutes ses operations froidement et par discretion voire de sorte que sa forme de vivre derogeoit à son aage. Car à ses gestes et contenance mieulx ressembloit à vieille femme que à jeune fille. Et davantage acceptoit la doctrine de ceulx qui avoient le gouvernement de sa personne tant courtoisement et en si grande humilité que par contradiction ne autrement ne les vouloit irriter. Si doyvent sur ce passage toutes jeunes filles prendre exemple et n'estre par orgueil rebelles ne contredisantes aux anciennes femmes si et quant elles leur remonstrent leurs faultes qui est un vice moult apparent et denigrant l'honneur d'une pucelle et dont plusieurs filles de bonne et grosse maison sont mal regardees. Lesquelles sans craincte et honte parlent plus asseurement que si elles avoient vescu cinquante ans. Et si par charité on s'efforce leur donner quelque bonne doctrine s'en mocquent et rient. Saincte radegonde ne faisoit ainsi ??????? ce qu'elle