Page:Keralio - collection des meilleurs ouvrages francois composes par des femmes tome 3.djvu/167

Nous le voulons richement guerdonner,
Et de nos biens à largece donner,
     Tesmoins nos seaulx,
Cy attachiés deuant tous nos feaulx,
Gens de conseil et serviteurs loyaulx.
Donné le jour saint Valentin, martyr,
En la cité de gracieux désir,
Où avons fait notre conseil tenir.

Par Cupydo et Venus souuerains,
A ce presens, plusieurs plaisirs mondains.

---

REQUÊTE

A fin de congié d’amours.

Dieu Cupydo et Venus la déesse,
     Supplie présentement
          Humblement
     Charles, duc d’Orleans,
     Qui a été longuement
          Ligement
     L’un de vos obéissans ;
     Et entre les vrais amans,
          Vos servans,
     Le temps de ses jeunes ans,
          Très plaisans
     A vous servir loyaument.

               Ф

     Qu’il vous plaise regarder.
          Et passer
     Ceste requête présente,
     Sans la voloir refuser ;