EXTRAICT DV PRIVILEGE
Par Lettres du Roy donnees le xviii. iour d’Octobre, m d. lxx. il eſt permis à Federic Morel, Imprimeur & Libraire en l’univerſité de Paris, d’imprimer & vendre La Meſnagerie de Xenophon, Les Reigles de Mariage de Plutarque, Vne Lettre de Conſolation de Plutarque à ſa femme. Le tout traduit de Grec en François par feu M. Eſtienne de La Boëtie Conſeiller du Roy en ſa Court de Parlement à Bordeaux : enſemble quelques Vers Latins & François, & autres œuvres de ſon invention : Item vn Diſcours de Monſieur de Montaigne ſur la mort dudict de La Boëtie. Avec inhibitions & deffenſes a tous autres Imprimeurs, Libraires & Marchands, de non imprimer ny vendre en ce Royaume leſdictes Oeuvres, en ſorte que ce ſoit, de neuf ans entiers, à compter du iour de la premiere impreſſion parachevee par ledict Morel : ſur peine de confiſcation des Exemplaires qui ſe trouveroient, de ſes deſpens, dommages & interets, & d’amende arbitraire. Outre ce a ledict Seigneur voulu, que en inſerant le contenu de ſes Lettres ou l’extraict d’icelles, à la fin ou au commencement des Liures qui ſ’en imprimeront, elles ſoient tenues pour ſuffiſamment ſignifees, & venues a la notice & cognoiſſance de tous Libraires, Imprimeurs & autres, tout ainſi que ſi leſdictes lettres leur avoient particulierement & expreſſement eſté monſtrees & ſignifees : comme plus amplement appert par leſdictes Lettres donnees à Paris les iour & an que deſſus, ſignees & ſcellees du ſcel dudict Seigneur.
