Arnaut de Montagut e li autre Gascon
Los sabon ben guidar per sela region.
Moncuc desamparero qu’ert del comte Ramon,
Tro a Pena d’Agenes n’an fait arrestazon.
Oncas en degun loc no troban contenson
Mas solament a Pena que del rei Richart fon :
Un dimartz l’asetgeron d’entorn e d’environ ;
Aqui ac mot Frances e Norman e Breton,
E i ac mot Alaman, Loarenc e Frizon,
E mot baro d’Alvernhe e mot ric Bergonhon ;
Mas lo castels es fortz, que nols preza .I. boton.
Manganels e peireiras i trazon e bosson.
N’Ugs dal Far es dedins qu’es de vas Aragon,
Bausas lo mainaders e en B. Bovon,
Girauds de Montf avens que a Moncuc en bailon,
E dels autres gran massa qu’ieu no sai ges qui son.
Lo setis i fo mes de la l’Asencion
E durec tro a setembre, si com ditz la canson,
C’om vol vendemiar.
E lo castels fo fortz que nol pog om forsar,
Tantas peiras i gieten aicels crozat de Bar
Am los grans manganels c’am pauc nol fan crebar.
Mot cavaer a dins, mot rotier, mot Navar.
Per lo comte Ramon le tenia n’Ugs del Far.
- ↑
— 2404. Ms. no an f. — 2413. Uc del Far, réd. en pr., comme aussi le poëme v. 2425. — 2414. Réd. en pr. ung apelat Dansas le maynadier, et Bernard Bour, et Geraud de Monsabes, et d’autres belcops (p. 46).