Per mei la cort se levan cada dos, cada tres,
Tuit denant l’apostoli, e pois an lo enques :
« Senher rics apostoli[s], ara saps tu com es ?
« Que lo coms de Montfort remas en Carcasses
« Per destruire los mals e que i mezes los bes,
« E casses los eretges els rotiers els Valdes,
« E pobles los catolics els Normans els Frances ;
« E poichas ab la crotz el a o tot comques,
« Agen e Caerci, Tolzan e Albeges,
« El fort Foig e Tholosa e Montalba, que i mes
« E ma de senta Glieiza, e la Gleiza l’a pres ;
« E pos tans colps n’a datz e receubutz e pres,
« E tanta sanc esparsa ab glazis mortales,
« E en tantas maneiras s’en es fort entremes,
« Non es dreitz ni razos c’om ara loilh tolgues,
« Ni non da a vejaire com toldre lalh pogues ;
« E qui la lhi toldria nos li serem defes.
— Baro, » ditz l’apostoli[s], « no pos mudar nom pes,
« Car ergolhs e maleza es entre nos ases.
« Nos degram governar per bon dreit tot cant es,
« E recebem los mals e fam perir los bes.
« E sil coms dampnatz era, aiso qu’el pas non es,
« Sos filhs perque perdra la terra ni l’eres ?
« E ja ditz Jhesus Christ, que reis e senher es,
« Que pel pecat del paire le filhs non es mespres ;
« E si el o autreja diirem nos que si es ?
« E no a i cardenal ni prelat tan plaides,
« S’aquesta razo dampna, qu’el non sia mespres.
« Enquera i a tal prolec que a vos no membra ges :
— 3498. pois, ms. poig. — 3502. Valdes, ms. valdres. — 3506. Ms. fortz ; — que i, corr. quel ?