E li corn e las trompas els grailes esclarzit,
An tota la ribeira e lo ca[m]p esbaudit.
E els punho ensemble, e an tant enantit
Que dins la major preissa se son entreferit,
Mas per lor de Belcaire foron be aculhit.
Mas li bran de Colonha e l’acer rebulhit
E las massas redondas e li clavel bulhit,
E las achas moluas e li escut forbit
E li dart e las flechas e li cairel polit
E penas e sagetas e li espieut brandit ;
Els cavalers ab lor valent e amarvit,
Els sirvens els alquiers que veno totz ardit,
E las autras companhas de be ferir aizit,
En totas las partidas an tal chaple bastit
Quel camps e la ribeira e la terran fremit.
Mas lo coms e n’Alans en Folcaut an sufrit
En Guis en P. Mirs lo chaplament el crit.
Ladoncs pogratz vezer tant ausberc desmentit
E tant bo escut fendre e tant demei cruisit,
E tant ponh e tant bras e tant pe sopartit,
E tanta sanc esparsa e tant servel fronzit,
Que non i a tant simple que non aia sentit.
Pero ilh de Belcaire son tant apoderit
Que firen los ne menen per lo cami polit.
Mas tant bes defendero no son guaire seguit.
Ladoncs pogratz vezer tant caval fervestit
Don foron li senhor trabucat e fenit !
— 4260. Ici un dessin ayant pour rubrique : La batalha del comte de Monfort ab Belcayre. — 4268. penas, corr. peiras ? — 4279. ab lor semble se rapporter à des personnages (le jeune comte, etc.) qui ne sont pas nommés dans la phrase qui précède. Il y aurait donc une lacune avant ce vers. — 4280. Corr. que o n’aia s. ?