« E si anc trachor foron volon estre leial ;
« Que cant eli jureron ins el libre missal
« Elh corneron forsat e non podion al,
« Que ben es tortz e forsa on dreitz no pot ni val,
« Car sagramen forsat a dreitura no val.
« Car cel que comquier terra ni pren l’autrui logal,
« E merma la dreitura e pren l’engan el mal,
« Pert l’onor comquerida e gazanha el cabal.
« E si m’en voletz creire oimais parlarem d’al,
« Car anc mai no vi seti tant fort descominal,
« Car cels dedins an joia e sojorn e umbral
« E bon pa e clara aiga e bos leitz e ostal
« El vi de Genestet que lor ve per canal ;
« E nos estam sa fora el perilh terrenal,
« E non avem mas polvera e la suzor el cal,
« E vin torbat ab aiga e pan dur senes sal ;
« E estam tot lo dia e la noit a jornal
« Garnitz de totas armas e gardam lo logal
« Que nos venhan combatre e que nos cridan d’al.
« E si gaire nos dura sest perilh enfernal
« Nos trazem major pena c’ardent de S. Marsal.
— Per Dieu, n’Ugs, » ditz lo coms, « nous clametz, que nous cal ;
« Que, per la santa missa qu’hom sagra el corporal,
« No veiretz Castelnou ni n’Alas Montreial
« Tro qu’ieu cobre Belcaire, la renda el cessal.
— Senher coms, » ditz n’Alas, « fin cor emperial
« Avetz, si Dieus mi valha, e dareus cosselh tal
« Don mermaretz tot dia de pretz e de cabal.
— 4803. Corr. la g. ? — 4823. mermaretz, corr. creisseretz ?