Qui eran ab lo comte, li dizon a .I. clatz :
« Per Dieu, nostre cars senher, a Toloza intratz ;
« Car si vos no i metiatz mas etz baros armatz,
« Ja no i trobaretz ome ab cui dins contendatz ;
« Car cel qui pren e cerca e quier los autruis gratz
« Mais li valdria mortz o que ja no fos natz.
— Baro, » so ditz lo coms, « Dieus ne sia lauzatz
« Car totz vostres coratges trob fis e esmeratz.
« De l’intrar de Toloza vos vei entalentatz :
« Anem la donc recebre, pos tuit vos i acordatz. »
Aisi fol parlamens empres e autrejatz,
Per que lo focs s’alumna e resplan la clartatz,
Car lo rics coms cavalga bonament e viatz
Dreitament vas Tolosa pels pogs e pels valatz ;
E traversa las combas e los grans bos fulhatz
E venc a la Garona e es outra passatz.
Rogers Bernatz cavalga, que s’es aprimairatz,
Ab petita companha dels melhs encavalgatz,
Ab tres Rogers dels autres, gonfainos desplegatz,
E va s’en dreitament on es la Salvetatz,
Encontran se ab Joris.
A l’encontrar d’en Joris leva lo bruitz el critz,
E ac n’i moutz dels nostres qui foro esbaïtz ;
Mas Rogers de Montaut los a ben adaptitz,
- ↑ — 5798. Ms. mõtz. — 5799. Ms. M. en R.
— 5778. Suppr. vos. — 5792. C’est au comte de Comminge que la réd. en pr. attribue le fait d’armes dont il va être question (p. 86).