« E nos e vos ensemble irem los envazir,
« En tantas de maneiras aisi dreit reculhir
« Que lor farem las lissas e los valatz omplir.
« E si podem la vila els baros comquerir,
« Tot essems sia vostre, e que non laisetz ir,
« Car en autra maneira nos po[i]ri’ avenir. »
E cant lo coms enten que nols pot sopartir,
El trembla e sospira e pres ad esfelnir,
E cavalgan ensemble, e van se asezir
Dins la novela vila.
Dins la novela vila albergan a prezent
E los traps e las tendas permei lo paziment.
Elh baro de Toloza feiron lor parlament,
E foron al cosselh tuit li plus e[n]tendent.
Mas n’Rogers Bernatz parla suau e dousament,
Car es gentils e savis e a valor e sen,
E es filhs del bon comte que te Fois e defent.
Belament se razona e ditz lor en rizent :
« Senhors, no i a cosselh mas del defendement,
« Que ja no i trobarem merce ni cauziment.
« E no aiatz temensa ni nous detz espavent,
« Que per so devem estre coratjos e valent
« Car avem bona vila e bo dreit ichament,
« E leial senhoria e Jhesu Crist guirent
- ↑ — 7417. Ce vers se construit mal ; il y a peut-être une lacune entre les deux hémistiches ; cf. v. 7555. — 7420. Mas n’, ms. Mans.
— 7410. non pour nos ne.