« E voldra la cobrar, cui que plassa o pes. »
Ditz lo coms de Montfortz : « Senher, so non es res,
« Car ieu ai conquerit Tolza e Agenes,
« Caerci e Bigorra, Cumenge ez Albiges ;
« E s’ieu conquer Tholosa nil senhor que dins es,
« Ieu e la santa Glieiza sirem en contrapes.
« E lo mati a l’alba can resplandral seres
« Nos menarem la gata pel mur sarrazines
« Tro dedins en la vila, qu’en aisi es empres,
« E per tota la vila lor metren foc grezes :
« O nos morrem essems o ilh seran comques ;
« Ja no tarzara gaire.
« Ja no tarzara gaire que vos tuit o veiretz
« Qu’ieu cobrare[i] Toloza e que vos la tindretz,
« E l’aver e la honor engalment partiretz.
— Senher, » ditz n’Amaldrics de Crio, « no gabetz ;
« Qu’encara n’es a raire tot lo majer peletz.
« Nous pes s’ieu vos deman vos com la cobraretz ?
« Car non es en la vila destreitz ni fams ni setz ;
« E ja tantas vegadas lo jorn nols combatretz
« Que fora de las lissas ins el camp nols trobetz ;
« E ja dedins la vila nulh temps nols enclauretz. »
El cardenals respon : « Tant cant los mantindretz,
« N’Amaldrics, santa Glieiza ni dreit non amaretz.
« Dau vos per penedensa que dema dejunetz,
« Que re, mas pa et aiga, no bevatz ni mangetz.
- ↑ — 8080. setz, ms. cetz.
— 8066. Ms. senher (abrégé). — 8067. Réd. en pr. E si podi recouvra Tolosa, la Gleisa et ieu seren egals et pariers (p. 100). — 8068. seres, ms. tetes, cf. v. 4981.