« E car ieu vos am tant prec vos que no pequetz,
« Que Jhesu Crist vos manda que er von castietz,
« Vos el coms de Saisso que mais nols razonetz.
— Senher, » ditz n’Amaldrics, « ligetz e trobaretz
« Que ja per esta colpa encuzar nom devetz :
« Que no ditz la Escriptura ni demonstra la leitz
« Que nulh princep de terra a tort dezeretetz.
« E si lo coms R. pert ara sos heretz
« Leialtat e dreitura lailh rendra autra vetz !
« Ez es grans meravilha car per autres desleitz
« Es abaichatz Paratges e perilhos e fretz.
« S’ieu saubes e ma terra c’aitals fos lo secretz,
« Ni ieu ni ma companha no i foram esta vetz.
— N’Amaldrics, » ditz lo coms de Montfort, « falhiretz
« Can ab lo cardenal mo senhor contendretz :
« No es dreitz ni razos que de rel contrastetz.
« Vos amaretz la Glieiza can lui obeziretz. »
Tant parlero ensemble tro que lo jorns es quetz ;
E a l’albor del dia, cant lo jorns es claretz,
Lo coms de Monfort manda : « Mei amic, sa vindretz,
« Ez anc en milhor ora nom valguetz nim valdretz :
« Ar empenhetz la gata, que Toloza prendretz,
« E totz mos enemics els vostres dampnaretz.
« E si prendetz Tholoza Jhesu Crist ondraretz
« E totz vostres dampnatges el meus restauraretz. »
Ladoncs sonan las trompas e li corn els grailetz,
Ez empenhon la gata ab critz e am ciscletz.
Entrel mur el castel ela venc de sautetz :
Aisi com l’esparver que menals auzeletz
— 8092. devetz, ms. denretz ou deuretz, cf. v. 8055. — 8096. Ms. autras. — 8097. Corr. autri ? — 8099. Ms. socretz. — 8116. Corr. q. cassals ?
