I venc tot dreit la peira que menal trabuquetz,
E feric la tal cop els pus autz solaretz
[Qu]e fier e trenca e briza totz los cors els correitz.
El com[s] de Montfort crida : « Jhesu Crist, que faretz ?
« Que si gaires me dura la ira ni l’effretz,
« Mi e la santa Glieiza e la crotz abatretz. »
E li baro respondo : « Senher, nous ahiretz ;
« Que si viratz la gata al colp la gandiretz.
— Per Dieu ! » so ditz lo coms, « ara doncs o veiretz. »
E cant la gatas vira e complic los passetz,
Lo trabuquetz albira et abriva sos gietz,
E donec li tal colp a la segonda vetz
Que lo fer e l’acier els fustz els claveletz
Fer e trenca e briza e lo grutz e la petz,
Que mans dels que la menan n’i laisset mortz e freitz.
De totas partz s’en fugen, el coms remas soletz.
En auta votz escrida : « Per Dieu ! sai remandretz ;
« Tot menaretz la gata o trastotz i morretz. »
Ez els li respondero : « Aicels que dins metretz
« Mais lor valdria plaga, febres o malavetz ! »
E lo coms de Tolosa e sos baros secretz
Parlan am lo Capitol aissi cum auziretz :
Trastuit essems dicheron : « Jhesu Crist, esta vetz
« Nos es grans obs e coita que vos nos cosselhetz. »
Ditz lo coms de Cumenge : « Senhor, mi entendetz :
« Qui ques perga en la gata vos hi gazanharetz :
« Sapchatz que elaus salva las vinhas els bladetz,
« Que mentre que la gaitan lo talar no lor letz.
« E no von donetz ira ni nous n’e[s]paventetz
— 8130. grutz, corr. glutz ? — 8138. Ms. Parlen. — 8141 et 8147. Ms. Senher, en abrégé. — 8142. la gata, le copiste avait d’abord mis l’aiga, mais il s’est corrigé.
