« Car per la crotz sanctisma, sia sens o foldatz,
« Nos irem per la gata si vos o comensatz.
« E si vos non o faitz, lo borcs e la ciutatz
« Son aissi tuit essems d’anar acoratjatz,
« Que desobre la gata i aura tans colps datz
« Que de sanc ab cervelas n’er lo camps ejoncatz :
« O tuit morrem essems o remandrem ondratz,
« Car mais val mortz ondrada que vivre laguiatz ! »
E li baro respondon : « Veus nos aparelhat[z] ;
« En grant bonaventura sial faitz comensatz,
« Que nos e vos essems, si a Jhesu Crist platz,
« Yrem ardre la gata !
« Nos irem per la gata, car be nos a mestiers,
« E nos e vos essems la prendrem engaliers ;
« E Tholoza e Paratges er totz temps pariers. »
Tota la noit complida lor creis lor desiriers,
Ez al albor del dia irem pels ostaliers.
N’Arnautz de Vilamur, car es mals e guerriers,
Fe garnir e emprendre los milhors cavaliers
E las bonas cumpanhas els valens soldadiers,
E garniro las lhissas els fossatz els solers
De balestas tornissas e de bos arcs maniers,
E cairels e sagetas e puas de liniers.
En Estotz de Linars atendens e obriers
De la part de lafora pels costals senestriers
- ↑ — 8331. irem, corr. van s’en ? ou intervertir les vers 8330 et 8331 ? — 8333. Ms. E fe g. — 8338. Ms. Escotz ; cf. v. 8158.
— 8322. Ms. ordrada. — 8326. gata, ms. terra.