« Bel senher arsevesque, vostra razo viratz,
« E preguem Jhesu Crist que nos garde, silh platz,
« Que autre reis no i venga ni autra poestatz ;
« Car si autre rei y ve, verament sapiatz
« C’ab nos albergara lo reis desbatejatz
« Ab tota sa companha e ab los almiratz. —
« Senhors, es[t] reproverbi vos dic que l’entendatz,
« Perque lo setis d’Acra es a nos comparatz :
« On mais avem de forsa plus nos teno sobratz,
« Que cant lo coms mos senher ez en Roger Bernatz
« E lo coms de Cumenge e mos senh’en Dalmatz
« Eran dins esta vila ab nos autres privatz,
« Lo rics coms de Montfort que es oltracujatz
« Estava dins las tendas en aisi acerratz
« Que si nos le laissesam el nos laichera em patz.
« Ara cant de Casnac venc mos senh’en Bernatz
« Ab sen e ab largueza e be acompanhatz,
« S’es lo coms de Montfort aissi abandonatz
« Que tantas de garidas nos an faitas de latz
« Tota la noit el dia nos te afazendatz ;
« E can venc lo coms joves qu’es la nostra clartatz,
« Nos a faita bastida que dins los olhs vos jatz ;
« E pois ab sas garidas s’es tant apropiatz
« C’ab u sautet que prenga pot intrar els fossatz :
« Si autre coms venia sins auria sobratz,
« E ab nos albergarian Simos ab sos crozatz.
« Francs cavalers mirables, en aiso vos acordatz :
« Pus que dins e deforas es lo jocs entaulatz,
« Oimais no pot remandre tro l’us sia matatz ;
« Que, per la santa Verge on floric castetatz,
— 8297. Corr. enserratz ?
