Qu’en Joris lo cavalga el manda requerir.
E li gasta sa terra.
E serca e cavalga e menassals faizitz,
A Sent Gauzens s’en intra, car n’es essenhoritz,
Ab belas armaduras e ab bos arabitz.
En Br. de Cumenge, bels e bos e grazitz,
El castel de Salinas, de mainada escaritz...
E de las entresenhas es lor cors esfelnitz ;
E tramet sos messatges coitos e amarvitz
Als baros de Tholoza e als melhs enarditz,
E al comte son paire qu’es de bos aips garnitz,
Que socors li trameta car l’en era aizitz.
En Joris ab gran joya es de la terra ichitz,
E venc per la ribeyra ab sos senhals banditz,
En Br. de Cumenge a los baros legitz,
Los milhors els pus savis e los pus afortitz,
Ben complitz de lor armas e belament garnitz ;
E cant lo jorns repaira e lo temps abelitz,
Lors senheiras aussadas els gonfainos banditz
Se son per la ribeira apres lor aculhitz ;
E can vengron a Martras Joris n’era ichitz.
E cant no l’atroberon desobre Sent Felitz,
Es en la bella plassa lo parlamens bastitz ;
Ez a dig l’us a l’autre : « Arals avem seguitz ! »
Ab tant n’Inartz de Punhtis qu’es pros e ichernitz
Denant totz se razona e al[s] be enqueritz :
« Senh’en Br., bem sembla s’aisils avem giquitz,
- ↑ — 8795. Lacune après ce vers ? — 8803. a, ms. ab.