« Vos meteis e nos autres avetz vius sebelhitz ;
« Mas, si m’en voletz creire, ja no siretz falhitz :
« Cavalguem tot le dia trols aiam cosseguitz,
« E sins volon atendre er aitals l’escroichitz
« Tro de l’una partida sia lo camps gurpitz ;
« E si nols atrobam, si ja nulhs hom lor ditz
« Quels aiatz per batalha encaussatz ni seguitz,
« Totz temps n’auran temensa e auretz nos gueritz.
— Senhors, » ditz Marestanhs, « mos neps sia obezitz. »
Ez ab aitant s’acolho per los camis politz.
E cant a Palmers vengo, us hom de la lor ditz :
« Senhors, veus aquin Joris que ades n’es partitz ;
« Si nols anatz socorre tost aura convertitz
« Los omes de Melha e mortz e destruzitz. »
Ditz n’Otz de Sent Beat : « Dieus ne sia grazitz !
« Anc sempr[e] gaban Joris que nos ha arramitz,
« E si m’en voletz creire ara n’er dementitz. »
Ditz Ramon At d’Aspel : « Ans quens aian sentitz,
« Nos acordem essems cals sera nostr’arditz,
« Que si ilh s’en anavan trols aiam conqueritz,
« Nos e nostre lhinatges n’er totz temps escurzitz.
— Senhors, » ditz n’Espanels, « pos lo faitz er cumplitz
« Cum que sia dels autres Joris sia sazitz,
« Perqu’en Rogers d’Aspel sia soutz e gueritz. »
E cant foron essems al parlament aizitz
An Br. de Cumenge los baros somonitz.
Belament se razona ez als totz esbauditz :
« Senhors francs cavaliers, lo vers Dieus Jhesu Cristz
« Nos ama ens governa e nos ha ben aizitz,
« Quels nostres enemics quens avian delitz
— 8839. Ms. Alpel.