E tozetz e tozetas e efans menuziers
Que cantan las baladas e los versetz leugiers,
E feiron las clauzuras els fossatz els terriers
Els pons e las barreiras els murs els escaliers
Ez ambans e corseiras e portals e solers
E lhissas e arqueiras e dentelhs batalhiers
E bocalhs e gueridas e guisquetz traversers
E trencadas e voutas e camis costeners ;
Totas las barbacanas e celas dels gravers
An lhivradas als comtes e als fis capdaliers.
La vila es establida finament a doblers
Contra l’orgolh de Fransa.
Contra l’orgolh de Fransa es faitz l’emprendemens
Quel coms joves defenda si mezeih e sas gens.
E laïns en Tholoza es aitals mandamens
Que per tota la vila essems cominalmens...
E lo valens coms joves si’als comenssamens,
Els baros de las terras acordans e garnens
Las obras e las gaitas partiscan engalmens,
E que la nog el dia porton los garnimens.
Els cossols de la vila ab los baros prezens,
Cavalers e borgues ben asesmadamens
Las portas de la vila lhivran als baros dens,
Als milhors, al[s] pus savis ez als melhs entendens.
E pueish las barbacanas els novels bastimens
An lhivradas als comtes ez als baros prendens.
Ez en Dorde Barasc on es pretz e jovens,
- ↑ — 9446. Lacune après ce vers ? — 9457. en, ms. an. — 9457-545. Voici