« Si tendra vi o aiga o brizaral morters.
« Si la podem defendre espandir s’al rozers,
« E tornara Paratges e gaugs e alegriers. »
En aqu[e]stas paraulas es empres l’acorders.
E li cossol respondo : « Tot cant quels er mestiers,
« Als baros de las terras, lor darem volontiers ;
« Ez a las companhias del[s] sirvens logadiers
« Darem bonas viandas e gentils ostalers.
« E mandam per la vila que totz los escudiers
« Vengan lhivrazo prendre largamens, ses diners,
« E los pas e las carns e los vis dels celiers,
« E civada e ordi a mueitz e a sestiers
« E pebre e canelas e los frugs dels fruchiers,
« Que re nols calha diire mas can : Boca, que quiers ?
« E si lo reis mos senher vol esser maligners
« Be nos poirem defendre d’aquetz .V. ans pleniers. »
Can del cosselh partiren, lo comensars primers
En la sobrana vouta on es l’gentils cloquers
Mezon sant Exuperi e lums e candelers :
Bisbes fo de Tholoza dignes e santorers,
E defen e restaura totz loz sieus heretiers.
Ez en apres mandero als milhors carpenters
Que per tota la vila dins los pazimenters
Bastiscan los calabres els engenhs els peirers,
E qu’en Bernatz Paraire e maestre Garners
Anols trabuquetz tendre, car ne son costumers.
Per totas las partidas trian cominalhers
Cavalers e borgues els milhors mercaders,
Qu’establiscan las portas e que mandols obriers.
Ez obreron ab joya totz lo pobles grossiers,
— 9408. Ms. mandan. — 9412. canelas, ms. candelas.
